ច្បាស់ហើយក្រុមខ្លាំង២ នៅលីគទី២និងឡើងទៅលេងនៅលីគកំពូលតែមានលក្ខខណ្ឌ

បន្ទាប់ពីប្រកាសពេលវេលាប្រកួតលីគលំដាប់ទី២ រួចមក សហព័ន្ធកីឡាបាល់ទាត់ជាតិកម្ពុជាបានចេញសេចក្ដីប្រកាសមួយទៀតថា ក្រុមខ្លាំងលេខ១និងលេខ២ នៅលីគលំដាប់ទី២នេះ នឹងបានទៅលេងលីគកំពូលកម្ពុជានៅរដូវកាលក្រោយ ប៉ុន្តែមានលក្ខខណ្ឌមួយផងដែរ។

ក្រុមបាល់ទាត់យុវជនគីរីវង់សុខសែនជ័យ

ដោយលក្ខខណ្ឌមួយនោះ គឺប្រសិនបើក្រុមលេខ១ឬលេខ២នៃលីគទី២នោះ ជាក្រុមដែលកើតចេញពីក្លឹបលេងនៅលីគកំពូលស្រាប់ នោះពួកគេមិនអាចទៅលេងនៅលីគកំពូលបាននោះទេ ដោយត្រូវសម្រេចយកក្រុមមានចំណាត់ថ្នាក់បន្ទាប់ទៅជំនួសវិញ។ បន្ថែមពីលើនេះដែរ សេចក្ដីប្រកាសរបស់សហព័ន្ធបានបញ្ជាក់ទៀតថាក្រុមលេងនៅលីគកំពូលរដូវកាលនេះ មានចំណាត់ថ្នាក់លេខ៩និងលេខ១០ ត្រូវកាត់ចេញទៅលេងនៅលីគលំដាប់ទី២ នៅរដូវកាលក្រោយហើយ។ នេះមានន័យថា២ក្រុមដែលខ្លាំងនៅលីគ២ នឹងត្រូវជំនួស២ក្រុមដែលត្រូវកាត់ចេញនៅរដូវកាល២០១៧ នៃលីគកំពូលកម្ពុជា។

រំលឹកដែរថា២ក្រុមដែលត្រូវកាត់ចេញពីលីគកំពូលទៅលេងនៅលីគទី២រដូវកាលក្រោយ មានមជ្ឍមណ្ឌលកំចាត់មីនកម្ពុជា និងក្រុមអាស៊ីអឺរ៉ុបយូណាយធីត។ ខណៈដែល២ក្រុមដែលត្រូវឡើងមកជំនួសតំណែងពួកគេមិនទាន់រកឃើញនៅឡើយទេ ព្រោះលីគទី២ នឹងចាប់ផ្ដើមនៅថ្ងៃទី២៥ខែកញ្ញារហូតដល់ថ្ងៃទី២៥ខែធ្នូឆ្នាំ២០១៦ឯណោះ។

ក្រុមអាស៊ីអឺរ៉ុបយូណាយធីត

ក្រុមស៊ីម៉ាក់

ក្រុមដែលចូលរួមប្រកួតលីគទី២នេះ រួមមាន ក្រុមបាល់ទាត់ខេត្តស្វាយរៀង ក្រុមបាល់ទាត់ខេត្តកំពង់ឆ្នាំង សាលាបាល់ទាត់ជាតិបាទី ក្រុមបាល់ទាត់ សៀមរាបអង្គរអែហ្វស៊ី ក្រុមបាល់ទាត់ គិរីវង់សុខសែនជ័យ ក្រុមបាល់ទាត់ អគ្គីសនីកម្ពុជា ក្រុមបាល់ទាត់ កំពង់ផែស្វយ័តខេត្តព្រះសីហនុ ក្រុមមជ្ឍមណ្ឌលហ្វឹកហ្វឹនកីឡា ខេមរភូមិន្ទ និងក្រុមបាល់ទាត់ខេត្តកំពង់ស្ពឺ៕