Ronaldo & Bale បង្ហាញទម្រង់លេងខុសប្លែកពីមុន ធ្វើឲ្យគ្រប់គ្នាភ្ញាក់ផ្អើល

Cristiano Ronaldo និង Gareth Bale បានសហការគ្នាយ៉ាងល្អ ជួយរកគ្រាប់ទី១ឲ្យ Real Madrid អំឡុងការប្រកួត UEFA Champions League ស្មើ ២-២ ទល់នឹងក្រុមខ្លាំងអាល្លឺម៉ង់ Borussia Dortmund កាលពីយប់មិញ ហើយតារាឆ្នើមទាំងពីររូបនេះ ថែមទាំងចុះជួយតំបន់ការពារយ៉ាងច្រើនមិនធ្លាប់មាន ធ្វើឲ្យអ្នកគាំទ្រជាច្រើនភ្ញាក់ផ្អើល និងស្ងើចសរសើរយ៉ាងខ្លាំង។

Ronaldo ស៊ុតគ្រាប់ទី១ឲ្យ Real ក្រោយ Bale បញ្ជូនឲ្យយប់មិញ

Bale (ទាត់បាល់) ពេលប៉ះជាមួយខ្សែការពារក្រុម Dortmund

បើតាម Marca បានបង្ហាញផែនទីឲ្យឃើញថា ខ្សែបម្រើប្រយុទ្ធ CR7 និង Bale លេងបានយ៉ាងល្អនៅតំបន់ស្លាបឆ្វេងស្ដាំ ប៉ុន្តែពួកគេក៏ចុះជួយនៅតំបន់ការពារយ៉ាងច្រើនបំផុត ខុសពីមុន។ អ្នកចាត់ការ Zinedine Zidane ធ្លាប់លើកឡើងថា ការពារមិនត្រូវពឹងផ្អែកទៅលើតែខ្សែការពារប៉ុណ្ណោះទេ ហើយពេលនេះ Super Star ទាំងពីររូបនេះ ហាក់យល់ពីសម្ដីរបស់អ្នកចាត់ការសញ្ជាតិបារាំង។

ក្រុមស្ដេចស Real ៩ប្រកួតរដូវកាលថ្មីនេះ បិទគូប្រកួតមិនឲ្យស៊ុតចូល (Clean Sheets) បានតែ២ដងប៉ុណ្ណោះ ហើយទោះបីយប់មិញ Ronaldo និង Bale ចុះជួយការពារច្រើនយ៉ាងណា ក៏នៅតែ Dortmund អាចស៊ុតបាន២គ្រាប់ទៀត ប៉ុន្តែនេះជាសញ្ញាល្អមួយសម្រាប់ក្រុមម្ចាស់ការពារតំណែងជើងឯក កំពូលអឺរ៉ុបនៅប្រកួតបន្ទាប់ៗទៀត៕

ប្រែសម្រួល៖ Ball855
ប្រភព៖ Marca | Dailymail