“Pogba ថ្មី” វ័យត្រឹម១៤ឆ្នាំ ចូលលេងឲ្យឈុតធំក្រុម Galatasaray

សប្ដាហ៍មុនក្រុម Celtic បានធ្វើឲ្យសារព័ត៌មានជុំវិញពិភពលោកចាប់អារម្មណ៍យ៉ាងខ្លាំង បន្ទាប់ពីឲ្យកីឡាករវ័យក្មេង Karamoko Dembele ត្រឹម១៣ឆ្នាំ ចូលលេងនៅឈុត U-20។ ប៉ុន្តែកាលពីយប់មិញ ក្រុមយក្សទួរគី Galatasaray បានធ្វើរឿងដ៏អស្ចារ្យជាងនោះទៀត ដោយឲ្យកីឡាករ Mustafa Kapi វ័យត្រឹម១៤ឆ្នាំ អាចបង្ហាញខ្លួនឲ្យឈុតធំតែម្ដង ក្នុងការប្រកួតមិត្តភាពជាមួយក្រុម Levski Sofia។

Mustafa Kapi វ័យ១៤ឆ្នាំ ជាប់ឈុតធំក្រុម Galatasaray

Kapi ត្រូវបានគេប្រៀបធៀបទម្រង់លេងទៅនឹងកំពូលកីឡាករថ្លៃបំផុតលើពិភពលោក Paul Pogba របស់ក្រុមបិសាចក្រហម Manchester United ដោយសាររូបគេលេងតំណែងជាខ្សែបម្រើការពារ និងអាចស៊ុតបាល់ពីចម្ងាយយ៉ាងល្អដូចគ្នា។ ការប្រកួតយប់មិញ Galatasaray បានឈ្នះ ២-០ ខណៈដែល Kapi បានលេង២នាទីនៅចុងម៉ោង។ ទោះលេងបានតែ២នាទី ប៉ុន្តែវាជាពេលវេលាដ៏អស្ចារ្យបំផុត សម្រាប់អនាគតកីឡាករវ័យក្មេងរូបនេះ៕